قصة سيدنا أبو هريرة رضى الله عنه

[b]قصة سيدنا أبو هريرة رضى الله عنه
كان ياما كان يا سعد يا إكـــرام
ما يحلى الكـــــــــــــــــــــــــلام
إلا بذكر النبي عليه الصلاة والسلام
كان زمان أيام الرسول عليه الصلاة والسلام كان فى رجل طيب جدا اسمه سيدنا أبو هريرة...

تعالو الأول أقولكوا..عارفين يعني ايه هريرة ؟؟
يعني قطة صغيرة...
هرة يعني قطة....وهريرة يعني قطة صغيرة

طيب عارفين ليه هو اسمه أبو هريرة؟؟

مش أنا قلت لكم إن سيدنا أبو هريرة طيب جدا...؟
عارفين كان بيعمل ايه؟
كان بيشيل قطة جوه الكم بتاعه
يعني مش كان بيضربها ولا يخوفها ولا يعملها حاجة وحشة أبدا..
كان بيأكلها ويشربها ويطبطب عليها...شفتوا كان طيب ازاى..؟
يالا يا حبايبي قولوا رضى الله عنه (وهنا نعلمهم إن لما نقول اسم صحابي يقولوا رضى الله عنه)

كان سيدنا أبو هريرة بيسمع كلام مامته ومش بيزعلها أبدا..وهى كمان كانت بتحبه جدا..
بس هى كانت مش مسلمة...كانت من الكفار اللى بيشتموا ربنا وبيشتموا الرسول وبيقولوا عليهم كلام وحش..
وفى مرة مامة أبو هريرة قالتله كلام وحش خاااالص عن الرسول صلى الله عليه وسلم...
(وطبعا لازم يظهر على معالم وجهك الحزن الشديد لأن فى حد سب النبي صلى الله عليه وسلم)
طبعا سيدنا أبو هريرة زعل جدااا من مامته....
ينفع يا ولاد حد يشتم الرسول صلى الله عليه وسلم؟؟
مينفعش طبعا...لو لقينا حد بيعمل كده لازم نقول "يا رب اهديهم"

طيب سيدنا أبو هريرة عمل ايه؟؟؟ يا ترى هو صرخ على مامته؟؟
لا طبعا علشان هو مؤدب يا حبايبي ومينفعش أبدا حد مؤدب يزعأ لمامته...
طيب يا ترى هو عمل ايــــــــــه؟
راح سيدنا أبو هريرة للرسول صلى الله عليه وسلم واشتكى له من اللى حصل...
ولما الرسول صلى الله عليه وسلم سمع كده منه..دعى لأبو هريرة ولمامته إن ربنا يهدي مامته
ويجعل كل الناس تحبهم..
ولما روح سيدنا أبو هريرة البيت مامته قالتله استنى..متدخلش..وبعدها طلعتله...كانت عملاله مفاجأة جميلة جدا..
وهى إنها بقت مسلمة وبقت بتحب ربنا وبتحب الرسول صلى الله عليه وسلم زى سيدنا أبو هريرة..
وطبعا سيدنا ابو هريرة فرح جدااااا إن مامته بقت مسلمة..لأن ربنا بيدخل كل المسلمين الجنة..
ايه رأيكو يا حلويييييين...حنعمل زي سيدنا أبو هريرة ونسمع كلام مامتنا..؟
ونكون طيبين مع الحيوانات؟؟ حنديهم الأكل والشرب ومش حنجرى وراهم ولا نخوفهم
: